كرات الجبنه بالزعتر و البيتزا

مرحبا أصدقائي ،،،
برد ..برد ..برد.و الكل عم بتحضر للاجواء الباردة و منخفض هدى القادم ..حاليا الساعة عندي الثامنه الا ربع بتوقيت فلسطين و الامطار ما شاء الله بدأت بالانهمار و أصوات الرعد لا تتوقف .يا رب تكون أمطار خير و بركة على الارض و البشر و كل من على هذه الارض ..
عنجد اجواء اللمة بالبيت و الدفا حلوه كتير و خاصة اذا اتبعناها طبعا بأكل كتيييير ..
بس بوجود الاطفال و ازعاجهم اللامنتهي بنتقص من دفء هالأجواء ..بس شو بدنا نعمل !!؟..الله يحماهم يا رب :

 مبارح تحضيرا للاجواء اعملت شوية معجنات من بيتزا و كرات الجبنه و الزعتر ..ما بدهم ابتكار ،بس مجرد افكار شو نعمل ب هالاجواء و الخير جاي :D

كرات الجبنة و الزعتر 

• عجينة العشر دقائق (نصف الكمية )
• كوب زعتر اخضر مفروم
• كوب جبنة بيضاء البلدية (انا بحبها مالحة ..حسب الرغبة طبعا).

نخلط العجينة مع الجبنة و الزعتر جيدا
نمسح صينية الخبز بزيت زيتون
نبل ايدينا بزيت الزيتون و نكور كرات من العجينة و نضعها في صينية متباعده 2 سم عن بعضهم
نتركهم يرتاحو 10 دقائق
ثم نخبزهم في فرن محمى مسبق لحرارة متوسطة الى مرتفعة 

البيتزا

• صلصة البيتزا البيتية التي اعددناها سابقا
• عجينة العشر دقائق (نصف الكمية تكفي لعمل صينية بقطر 40 سم )
• جبنة موزريلا (انا بستخدم جبنة صفرا عادية من المتواجدة بالاسواق و بتسيح و طعمها زاكي و موفرة ؛) )
• اي اضافات بتحبوها (فليفلة ملونة ،زيتون،نقانق،ذرة ..)

تفرد العجينة في صينية خبيز ممسوحة بزيت زيتون
تفرد الصلصة عليها بمقدار نصف كوب
نضيف المكونات الاضافية و تخبز في فرن محمى مسبقا
و الجبنة اضعها في الاخير و احمرها و النار فوقها حتى تسيح الجبنة ..

عند الاكل يمكن اضافة مزيج من البهارات الحارة المكسيكية مع اوريغانو و ملح على الوجه (طعم مميز :) )

☆☆ فكرة ☆☆

في هاي الاجواء كتير بتغلب كيف يدفي العجين ؟؟
سخني ماء بطنجرة ثم ضعي وعاء العجن فوق الطنجرة ..و يفضل وعاء العجن ستانلس حتى تصله الحرارة اسرع
بس طبعا ما نرفع الحرارة كتير حتى ما يبطل مفعول الخميرة.

و ما تنسوا تعملوا حلو التمرية الدافئة ب هالبرد ..يعني هذا موسمها بامتياز 

و صحتين و عافيه :)