مرحبا أصدقائي ،،،
قال يوم جمعة و بدنا ننام و نرتاح هيك بكون الواحد متصور :(
بس لما الست سناء و السيد آدم يصحوا بكير ما في مجال الا اقوم و اصحصح :@
و بما انه صار امر واقع فالأحسن اقوم و احضر فطور و نعيش أجواء صباح الجمعة.
صار هسه وقت قدوح البيض ..الكل بحبها و اكلة تراثية .
لما كنت اعملها مرات بالفرن احسها بتنشف و البيض بنشف و ببطل زاكي ..بس من خلال النت و التلفزيون و برامج الطبخ المتنوعة الي بتقدروا تحكوا اني شغوفة فيها اعرفت كيف اتعامل معهم بالفرن و خاصة افرانا مش مثل بيت النار في المخبز.
طبعا ستات البيوت المعدلات كتار ما شاء الله عليهم و هذه الاشياء اعتياديه عندهم بس فعليا حضرتي ما زلت في طور اتعلم ابسط الاشياء و اكيد مثلي كثار و هون بالمدونه بعرض خبراتي الي بتعلمها خلال مسيرتي كست بيت :D
المكونات :
- عجينة العشر دقائق انا بعمل نصف الكمية لانو عيلتنا صغيرة
- بيض
- ملح و شوية فلفل اسود او اي نوع بهار عربي حسب الرغبة
طريقة العمل :
نحضر صينية الخبيز و نضعها داخل الفرن و نشغل الفرن على درجة حراره ما بين المتوسط و العالية.
نقرص العجين بحجم كرة المضرب.
نأخذ قرص و نرقه بسمك 1 سم تقريبا القطر (ممكن باستخدام اليدين على سطح عليها القليل من الزيت)
نخرج الصينية بعد ما تكون اكتسبت قدر وافر من الحرارة و نضع فوقها ما تتسع له من اقراص.
سنلاحظ ارتفاع العجين قليلا على السطح الساخن.
نقوم برفع العجين من اطرافه عن السطح بواسطة اطراف الاصابع بحيث يصبح للقرص حافة لا ينزلق البيض من العجين.
نرجع الصينية الى الفرن و نتركها في الفرن الى ان يتحمر قليلا قعر الاقراص.
ثم نفقص بيضة على العجين مباشرة و نملحها و نبهرها و نخفقها بشكل عشوائي على العجين و نضع الصينية و النار اعلاها الى ان يستوي البيض.
ملاحظات :
- يمكن دهن البيض بعد الاستواء مباشرة بقليل من الزبدة (يعطيها طعم و طراوه).
- يمكن اضافه القليل من الجبنه على سطح البيض
- وضع البيض مباشرة على العجين و هذا ما نلاحظه في المخابز يساعد على تماسكه و عدم انزلاقه من العجين لان خفقه في وعاء جانبي يعطيه خاصية السيولة اكثر،بالاضافة ان الشكل يكون اجمل و اللونين الاصفر و الابيض للبيض يكون متموج .
- تسخين الصينية في الفرن تساعد في عدم جفاف العجين.لانه يأخذ وقته ليسخن لو وضع على سطح صينية باردة.
وصحتين و عافيه :)
تعليقات
إرسال تعليق