فتة المكدوس

مرحبا أصدقائي ،،،
البعض سألني كيف بتلاقي وقت للمدونه و عمل الاكل و تصويره ..فعليا الي بعمله مش اشي احترافي و هو غداء او عشاء العيلة او تحلاية و كله بروح الحمد لله ..
و مع هالاولاد و الشغل و الروتين اليومي بحب الواحد يعمل اشي بحبو و بفضل أجهزة المحمول الذكية صرت اقدر وين ما كنت و متى صحلي وقت لو بسيط اكتب على المدونة .
صحيح لحد الان ما في تفاعل في التعليقات على المدونه بس انا بلاحظ من خلال الاحصائيات الي بزودني فيها موقع blogger انها بتزيد نسبة مشاهدتها و من بلدان مختلفة و هذا بالتأكيد شيء بسعدني.

اليوم جاي و جايبي معي فتة المكدوس بطبقاتها الزاكية و يلا نبدأ..

طبقة الخبز

رغفين خبز مقطعين مكعبات و مملحين و مقلين.

طبقة الباذنجان

حبتين باذنجان وسط مقطعين مكعبات و مملحين و مقلين و مصفين من الزيت.

طبقة صلصة البندورة 

خمس حبات بندورة وسط مقشرة و مطحونة على محضرة الطعام او بخلاط الكوكتيل ..توضع على النار مع شوية ملح و فلفل اسود و تغلى الى ان تتكاثف نوعا ما .

هذه الطبقة موجودة في كل وصفات الشيف الي على النت ..بس انا صراحة ما شعرتها كتير متجانسة و خاصة انو في طبقة لبن بالاخر .

طبقة اللبن

• نصف كيلو لبن
• سنين ثومة صغار
• ملعقتين كبار طحينية مسح
• ملعقة كبيرة ليمون
• نصف معلقة صغيرة ملح

تهرس الثومة ناعم جدا و تضاف الى باقي المكونات و تخلط المكونات جيدا الى ان تتجانس مثل الكريمة.

طبقة اللحمة 

• بصلة كبيرة مقطعة ناعم
• 300 غرام لحمة فرمة
• لوز مقلي
• بقدونس
• ملعقتين زيت
• بهار حسب الرغبة

يذبل البصل على النار مع الزيت ثم تضاف اللحمة و تطبخ الى درجة الاستواء ..يوضع الملح و البهار و تقلب.

التجهيز النهائي 

تضاف كل طبقة حسب الترتيب ..الطبقة الاخيرة تزين حسب الرغبة باللوز و البقدونس.

و صحتين و عافية:)